Link açıqlığı

Qırımnıñ vatandaş qamaçavınıñ teşebbüsçilerinden biri Lenur İslâmov bildire ki, yarımadanıñ energetik qamaçavı başlandı, ve devam etecek. İslâmov Qırım.Aqiqatqa izaat berip, «Ukrenergonıñ» faallerniñ niyetlerinden haberdar olğanını bildirdi.

«Bizler energetik qamaçavına başladıq, ve energetik qamaçav devam etecek. Energetika naziri bunı bile, amma ne sebepten aytmay, bu onıñ işi. «Ukrenergo» bizni añlay, anda da vatanperverler bar. Bizim taktik qararlarımız bar, olarnı tezden ögreneceksiñiz», – dedi Lenur İslâmov.

Onıñ aytqanına köre, qıtaiy Ukrainadan Qırım yarımadasına ketken elektrik energiyasınıñ dört ağından ekisi çalışa: «Kahovka – Canköy» ve «Ermeni Bazar – Or Qapı». «Kahovka – Ostrovskaya» tamirlene, «Melitopol – Canköy» de çalışmay.

«Bugün Qırım elektrik energiyasınıñ aman-aman 30%-nı almay. Elde etilgen malümatqa köre, künde ekişer saat Qırımda elektrikler kesile, Canköy, Aluşta, Aqmescitniñ bir qısmı – ışıqsız otura», – dep qayd etti Lenur İslâmov.

«Ukrenergonıñ» malümatına köre, «Ukrenergo» Milliy energetik şirketi» devlet müessisesiniñ reberligi Herson vilâyetinde tamir işlerine keder etken Qırım qamaçavı iştirakçilerinen añlaşıp oldı.

Ukraina energetika ve kömür sanayısı naziri Vladimir Demçişin bildire ki, Qırımnıñ «energetik» qamaçavı yoq, ve yarımada tolusınen temin etile.

Qırımnıñ «vatandaş» qamaçavınıñ iştirakçileri oktâbr 9-dan itibaren Canköy-Melitopol ağınıñ tamir etilmesine yol bermeyler, ve Qırımnıñ «energetik» qamaçavı başlanğanını bildireler.

XS
SM
MD
LG