Link açıqlığı

Aqmescitniñ Rusiye mahkemesi tarafından «fevral 26 işi» boyunca mahküm etilgen Eskender Nebiyev qabaatını tanıp, 2014 senesi fevral adiseleriniñ diger iştirakçileri aqqında aytmadı.

Bunı onıñ adliyecisi Cemil Temişev Qırım.Aqiqatqa bildirdi.

«Añlaşma qabaatnı tanımaq ve vaqia yerinde ne, nasıl keçirilgenini köstermekten ibarettir. Çiygoz aqqında ayttı, körgenini ayttı, amma şahsen tanış olmağanını bildirdi», – dep ayttı adliyeci.

Temişevniñ bildirgenine köre, Nebiyev Ahtem Çiygoznıñ «yapqanlarını, kimnen ve ne aqqında laf etkenini bilmey».

«Menim içün müşterimniñ azatlıqta bulunması müim. Kimsege iftira atmadı, biriniñ vaziyetini beter etmedi», – dep qayd etti adliyeci.

Onıñ bildirgenine köre, Eskender raatlıq künlerini vaqtınca yaqalav izolâtorında keçirip, «acelege» ücüm etilmesinde şeklengen babası Bekir Nebiyevniñ ölümini ögrengen soñ şok alda buluna.

Adliyeci dey ki, mahkeme ATRniñ sabıq operatorını şartlı olaraq 2 yıl 6 ayğa qadar apiske aldı.

Qırımtatar Milliy Meclisi qayd ete ki, Eskender Nebiyevniñ cezası Qırımnıñ Rusiye mahsus hızmetleri tarafından «acele» ekimleriniñ öldürilmesi işi ile bağlı ailesine yapılğan basqıdan soñ deñişkendir.

«Eskenderniñ bugünki mahkemeden evel bir qaç künge yaqalanması ailesine basqı yapmaq ıntıluvı ola bile, çünki prokuratura ve taqiqat qorantası acele yardım ekimleriniñ öldürüvinde şeklengen babası Bekir Nebiyevniñ bulunğan yerini gizley, dep tüşüne edi. Bekir Nebiyevniñ cesedi tünevin tapılmasa edi, belki de, bugün Eskender azatlıqqa çıqmaz edi», – dep yazdı Facebookta Qırımtatar Milliy Meclisi reisiniñ birinci muavini Nariman Celâl.

Meclis reisiniñ muavini dey ki, bu «aman-aman reinelik».

Meclis reisi Refat Çubarov Rusiye mahkemesiniñ Nebiyevge çıqarğan ükümi boyunca neticeler çıqarmağa aşıqmamağa çağıra: «İç bir kimse «iş» malümatları ne qadar deñiştirilgenini bilmey».

Cumaertesi künü, oktâbr 10-da, Aqmescit rayonında er kişiniñ cesedi tapıldı, ilk malümatlarğa köre, Aqmescitte «acele» ekimleriniñ öldürüvinde şeklengen Bekir Nebiyevge ait.

Bazarertesi künü, oktâbr 12-de, Aqmescitniñ Merkeziy rayon mahkemesi ATRniñ sabıq operatorı Eskender Nebiyevni «fevral 26 işi» boyunca eki yıl altı ayğa qadar şartlı olaraq apiske aldı.

2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar. Soñki apis cezası noyabr 19-da bitmek kerek.

XS
SM
MD
LG