Eskender Nebiyev mahkeme aldın taqiqat ile razı olıp, şartlı ceza aldı.
Bunı Qırımtatar Milliy Meclisi reisiniñ birinci muavini Nariman Celâl oktâbr 12-de Aqmescit mahkemesi çıqarğan ükümni izaatlap, Qırım.Aqiqatqa bildirdi.
«E, olarnıñ taqiqat ile añlaşması bar edi, o, 2014 senesi «fevral 26 işi» boyunca areketlerini tanıp, cevap olaraq belli üküm aldı», – dedi Celâl.
Onıñ aytqanına köre, oktâbr 9-da Nebiyev tekrar yaqalandı, bu añlaşma bundan soñ oldı.
«Natalya Poklonskaya kerçek apis cezasınıñ berilmesini rica etti. Lâkin bugün prokuratura toplaşuv başında Eskender Nebiyevniñ taqiqat ile razı olğanını ve müsbet yanaşqanını bildirip, Eskenderge şartlı ceza bermege rica etti», – dep qayd etti Celâl.
Nebiyevniñ bunıñnen bağlı izaatları daa yoq.
Bazarertesi künü, oktâbr 12-de, Aqmescitniñ Merkeziy rayon mahkemesi «fevral 26 işi» boyunca yaqalanğan ATR telekanalınıñ sabıq operatorı Eskender Nebiyevge eki yıllıq apis cezasını şartlı olaraq berdi.
Onıñ aytqanına köre, raatlıq künleri Eskender Nebiyev SİZOda keçirdi, çünki oktâbr 9-da Aqmescitniñ Merkeziy rayon mahkemesi kütleviy çatışmalar işini baqıp, onı mahkeme ükmü seslendirilgenine qadar apiske almağa qarar aldı.
Sabıq operator bu iş boyunca eki ay – aprel soñundan başlap iyün soñuna qadar – SİZOda yattı.
Qırımtatar Milliy Qurultayı Merkeziy saylav komissiyasınıñ reisi Zair Smedlâyev dedi ki, Nebiyev Ahtem Çiygozğa qarşı malümat bermegeninden sebep apiske alındı.
Smedlâyev Nebiyevniñ yaqalanmasını Qırım qamaçavına cevap olaraq «ticaret unsurı» dep adladı.
