Link açıqlığı

Lukaşenko Aqrusiye prezidenti saylavlarında ğalip çıqtı – Merkeziy saylav komissiyasınıñ ilk malümatları


Aleksandr Lukaşenko

Aqrusiyeniñ şimdiki prezidenti Aleksandr Lukaşenko bazar künü olıp keçken prezident saylavlarında beşinci kere ğalebe qazandı. Merkeziy saylav komissiyasınıñ ilk malümatlarına köre, saylayıcılarnıñ 83,49% Lukaşenkoğa rey berdi.

Merkeziy saylav komissiyasınıñ reisi Lidiya Yermoşinanıñ bildirgenine köre, namzet kösterilgen Tatyana Korotkeviç, «Govori pravdu!» kampaniyasınıñ faaline saylayıcılarnıñ 4,42% qoltuttı, Aqrusiyeniñ Liberal-demokratik firqasınıñ yolbaşçısı Sergey Gaydukeviçke – 3,32%, Aqrusiye vatanperver firqasınıñ yolbaşçısı, «Aqrusiye kazaklarınıñ» atamanı Nikolay Ulahoviçke – saylayıcılarnıñ 1,67%.

Saylayıcılarnıñ 6,4% er keske qarşı rey berdi. Umumen saylayıcılarnıñ 86,75% rey berüv aqqını qullandı. Aqrusiye muhalifetiiñ liderleri Nikolay Statkeviç, Vladimir Neklâyev ve Anatoliy Lebedko Aqrusiye prezidentiniñ saylavlarını «oyun» dep adladılar ve rey berüv neticelerini qabul etmeyceklerini bildirdiler.

Aqşam üstü Minsk merkezinde saylavlarnıñ neticeleri ile razı olmağanlar narazılıqqa çıqtılar. Bir qaç yüz insan Oktâbr meydanında toplaşıp, rey berüv qalplığına qarşı çıqtı. Faaller beyaz-qırmızı-beyaz bayraqlarnı açıp, diktaturağa qarşı levhalarnı köterdiler. Narazılıq bildirgenler Mustaqillik meydanına barıp, aktsiyanı dua ile yekünlediler.

İlk malümatlarğa köre, politsiya üç insanğa nisbeten memuriy bozuv aqqında protokol tizdi. Aqrusiye MSK prezident saylavlarınıñ neticelerini oktâbr 16-da ilân etmege planlaştıra.

XS
SM
MD
LG