Link açıqlığı

Qırım Ukraina toprağıdır, bu sebepten qırımtatarlar Rusiyeniñ tamır halqı olamazlar, dep tüşüne Birleşken Milletler Teşkilâtınıñ tamır halqları meseleleri boyunca Daimiy Forumnıñ prezident muavini, fin-ugorlarnıñ halqara areketiniñ faali Oliver Loode .

Bunı o oktâbr 12-de Qırım.Aqiqat Radiosınıñ saba efirinde ayttı.

«Qırım Ukraina toprağıdır, menim fikirimce, Rusiye qırımtatarlarnı tamır halq ya da tamır halq olmağan bir halq olaraq qabul etemez. Rusiye qırımtatarlarnı ne tüşüne, bu endi ekinci mesele», – dep qayd etti Oliver Loode.

Onıñ aytqanına köre, Rusiye qanunlarına köre, tamır halqlarnıñ bazı aq-uquqları az sayılı halqlarğa, sayısı 50 biñ insandan az olğan halqlarğa, em de tamır halqlarnıñ mahsus cedvelinde olğan halqlarğa ait.

«Bu mantıqqa köre, Rusiyede qırımtatarlar az sayılı tamır halq olamazlar», – dep qayd etti ekspert.

Ukrainada Estoniyanıñ Tışqı işler nazirliginiñ maddiy yardımı ile «Açıq diplomatiya vastalarınen qırımtatarlarnıñ aq-uquqlarını qorçalav» leyhası başlandı. Onıñ maqsadı halqara toplulıqnı qırımtatarlardan daa ziyade haberdar etmektir.

2014 senesi mart 20-de Ukraina Yuqarı Radası qırımtatar halqınıñ statusını tamır halq olaraq tanıp, 2007 senesi Birleşken Milletler Teşkilâtı Tamır halqlar aq-uquqlarınıñ Beyannamesine qoşuldı.

2015 senesi yazda Qırım Rusiye Devlet Şurasınıñ milletlerara munasebetler komitetiniñ reisi Edip Gafarov bildirdi ki, Qırım qarayları ve qırımçaqları Rusiye Federatsiyasınıñ az sayılı tamır halqları cedveline kirsetilecek.

Bundan evel, daa 2014 senesi, Qırımnıñ Rusiye yolbaşçısı Sergey Aksenov bildirdi ki, Qırımda yekâne tamır halq olaraq adlanmaq aqqı tek bir halqqa mensüp degil.

XS
SM
MD
LG