Link açıqlığı

«Vatandaşlıq» qamaçavınıñ faalleri naqliyat vastalarınıñ kiriş noqtalarında areket tarzı qaidelerini belgilediler


«Vatandaşlıq» qamaçavı ştabında naqliyat vastalarınıñ kiriş noqtalarında faalleriniñ areket tarzı qaidelerini belgilediler. Bunı Facebookta «vatandaşlıq» qamaçavınıñ faali, bloger Liza Bogutskaya bildirdi.

«Blokpostlarda bazı faalerniñ keçersiz areket tarzı sebebinden eki noqtanıñ reberleri deñiştirildi. Faallerniñ kiriş noqtalarında areket tarzı qaideleri işlep çıqarıldı. Şimdi sizge qaba davransalar, muracaat etmek içün telefon yolağı üzerinde çalışamız», – yaza Bogutskaya.

Bunıñ ile ştabnıñ açıq telefon yolağı aqqında malümatnı bloger şimdilik daa bermey.

Oktâbr 9 künü Havfsızlıq ve işbirlik boyunca teşkilâtnıñ bildirgeni kibi, Qırımnıñ mal qamaçavınıñ iştirakçileri tarafından yarımada ile memuriy sıñırda keçirilgen maşina tintüvlerine şikâyetler kele eken.

İnsan aqları boyunca Qırım alan eyyetiniñ temsilcileri oktâbr 6 künü Herson vilâyeti «Çonğar» kiriş noqtası rayonında teşkerüvni keçirdi. Malümatqa köre, neticede nice bozuluv qayd etildi. Uquq qoruyıcılar deyler ki, uquq qoruyıcı organlarınıñ temsilcileri olmağan silâlı insanlar maşina aydavcılarını salonlarını açmağa ve vesiqalarnı köstermege mecbur eteler.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

XS
SM
MD
LG