Qırımda cuma künü, oktâbr 9-da, ATR qırımtatar telekanalınıñ operatorı Eskender Nebiyevni yaqaladılar. Bunı Qurultayınıñ Merkeziy saylav komissiyasınıñ başı Zair Smedlâyev öz Facebook saifesinde bildirdi.
Qırım.Aqiqatqa belli olğanı kibi, Eskender Nebiyevni «fevral 26» işi boyunca уаqaladılar. Qırımnıñ rusiyeli prokurorı Natalya Poklonskaya cuma künü, oktâbr 9-da, Aqmescitniñ Merkeziy rayon mahkemesiniñ toplaşuvında mahkemeciden Eskender Nebiyevniñ cezasını deñiştirmege talap etti. Mahkemeci Nebiyevni mahkemeniñ nevbetteki toplaşuvına qadar apiske aldı.
2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
Aprel 22-de işbu iş boyunca ATR qırımtatar telekanalınıñ operatorı Eskender Nebiyev apiske alındı, bundan evel ise Ali Asanov da apiske alınğan edi.
İyün 18 künü Eskender NebiyevniQırım müftisi Emirali Ablayevniñ kefaleti boyunca azat ettiler.
