Qırımnıñ rusiyeli başı Sergey Aksenov qırımlılarnı, zaruriyet olmasa, yarımadanı terk etmemek, Ukrainadan sıñırdaş Rusiye vilâyetlerinden çıqmağa çağırdı. Böylece Qırımnıñ şimdiki başı Qırım ile memuriy sıñırda «vatandaşlıq» qamaçavınıñ keçirilmesine seslendi, dep yaza Qırımnıñ rusiyeli akimiyetiniñ «ruporı» Krıminform.
«Qırım tışına (Ukrainağa) tek kerek olğanda çıqıñız. Bu aşaalar andan ketmegence, yarımadada qalmaq ya da Qırımğa Rostov vilâyeti ya da Ukraina ile sıñırdaş olğan Rusiye Federatsiyasınıñ diger vilâyetlerinden kirmek», – tevsiye ete Aksenov.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
