Ukraina Haber siyaseti naziri Yuriy Stets dey ki, nazirligi Qırım tamır halqı – qırımtatarlarnı haber alanına celp etmek içün zaruriy areketlerni yapa eken. Bunı o Ukrainada Türkiye Cumhuriyetiniñ Fevqulâde ve Vekâletli elçisi Yonet Can Tezel ve eyyet başınıñ muavini, elçi keñeşçisi Özgün Talu ile körüşüvde bildirdi, haber ete ukrain nazirliginiñ matbuat hızmeti.
«Ukraina ve tamır halqımız – qırımtatarlarğa olğan munasebetiñizni bilip, vatandaşlarımıznı devletniñ haber alanına celp etmek içün öz tarafımızdan bütün zaruriy areketlerni etkenimizni bildirmege isteyim», – dey Stets.
Aytqanı kibi, nazirligi Qırım boyunca miqyaslı programmalarnı amelge keçire ve «qırımtatarlarsız yarımadanı qaytarmağa mümkün olmağanını» añlay. Onıñ içün nazirlik Ukraina prezidentiniñ qırımtatar halqınıñ işlerinden vekâletlisi Mustafa Cemilev ile işbirlikte buluna.
Nazir dey ki, «UA TV» telekanalında qırımtatar tiilinde programmalar olacaq ve nazirlikniñ qırımtatar tilinde çıqqan saytı bar olğanını hatırlattı.
