Herson vilâyeti İçki işler nazirliginiñ idare reberiniñ muavini İlya Kiva dey ki, uquq qoruyıcalır Qırımnıñ «vatandaşlıq» qamaçavı boyunca aktsiya iştirakçileri üzerinde nezaretni arttıracaqlar.
«İşğal etilgen territoriyağa taba ya da andan ketken vatandaşlarğa nisbeten qanunsız areketlerni toqtatmaq maqsadı ile narazılıq bildirgenlerniñ areketlerini daa da ciddiy sürette nezaret etecekmiz», – dey Kiva.
Onıñ aytqanı kibi, qamaçav iştirakçisi bulunğan er bir noqtada militsiya hadimleri turıp, Ukraina vatandaşlarınıñ aqlarına riayet etilmesini közetecek.
Kiva şunı hatırlattı ki, Qırım ile memuriy sıñırdan keçken avto aydavcılarınıñ maşinalarını teşkermek içün aktsiya iştirakçileriniñ aqları yoq.
«Tintüv – ayrı taqiqat ameliyatı, bu qadar. Teşkerüv yalıñız maşina aydavcılarınıñ razılığı ile keçirile bile», – dedi o ve şunı qoştı ki, bunı yalıñız militsiya hadimleri ete bile.
Uquq qoruyıcılar evel Qırım qamaçavında iştirak etken arbiyleştirilgen teşkilâtlar tarafından insan aqlarınıñ bozuluvı aqta bildirgen ediler. Şu cümleden, aydavcılarnıñ maşinalarını teşkereler, militsiyada bildirilgeni kibi, olarnıñı buña aqları yoq. Qırım vatandaşlıq qamaçavınıñ teşebbüsçilerinden biri Lenur İslâmov Qırım.Aqiqatqa aytqanı kibi, aq bozuluvları aqqında malümat – aktsiya işitrakçilerini yamanlamaq ıntıluvıdır.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
