Ukraina devlet sıñır hızmeti qıtaiy Ukrainadan Qırımğa deñiz yolu boyunca yükniñ ketirilmesi aqqında malümatnıñ teşkerüvini belgiledi.
«Bütün malümatnı teşkerermiz, şu cümleden, yükniñ deñiz boyunca ketirilmesi aqqında malümatnı da. Şimdilik bu malümattan iç biri tasdiqlanılmağan», – dedi Ukraina devlet sıñır hızmetiniñ spikeri Оleg Slobodân brifingde oktâbr 8 künü.
«Al-azırda bu malümatnıñ resmiy tasdiqlavı yoq, çünki işğal etilgen Qırım tarafına iç te gemiler yürmey», – qayd etti Slobodân.
O şunı da hatırlattı ki, qamaçavnıñ başlanmasından Qırım tarafına memuriy sıñırnı iç bir yük maşinası keçmedi.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
