Ukrain sıñırcıları Qırım ile memuriy sıñırda yolcu aqımınıñ eki qat eksilüvini qayd ete. Bunı Herson vilâyeti tarafından yarımada qamaçavı boyunca vatandaşlıq aktsiyası ile bağlaylar.
«Umumen, Qırım ile memuriy sıñırda, em bu, em o taraftan yolcu-naqliyat aqımınıñ eki qat eksilüvini qayd etemiz», – dep bildirdi Ukraina Devlet sıñır hızmetiniñ spikeri Оleg Slobodân brifingde oktâbr 8 künü.
Onıñ sözlerine köre, Qırım ile memuriy sıñırda vaziyet şimdilik «ğayet sakindir».
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
