Herson vilâyetinde yarımada ile memuriy sıñırnıñ yanında teşkil etilgen Qırımnıñ «vatandaşlıq» qamaçavınа yañı evliler keldi.
Qırım.Aqiqat mühbiri bildirgeni kibi, toy maşinaları «Çonğar» kiriş noqtasına kelip çıqtılar. Onıñ yanında özlerini «Qırım maydanı» olaraq adlağan qamaçav iştirakçileriniñ çadırları yerleştirilgen.
Yañı evliler ve musafirler iştirakçilernen subetleşmege çıqtı, maşinalardan qırımtatar yırlary eşitile edi. Aktsiya iştirakçileri musafirlerni oyun ve hayırlavlar ile qarşıladılar.
Malüm olğanı kibi, yañı evliler Novoalekseyevkadan evlenüv qaydından soñ keldiler.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
