Qırımnıñ «vatandaşlıq» qamaçavına qol tutqan deputatlar sırasına kirgen Ukraina Yuqarı Radasınıñ deputatı Georgiy Logvinskiy dey ki, bazı «formalı insanlarnıñ» areketleri tek aktsiyanı degil de, ukrain devletini de itibardan tüşüre. Aytqanı kibi, qamaçav noqtalarında vatandaşlarnıñ aqlarınıñ bozuluvını qayd etmek ve uquq qoruyıcılarğa bildirmek kerek.
Bunı o Qırım.Aqiqatqa bildirdi.
«Qamaçav ştabınıñ call-merkezi bar, anda telefon etip, haber bermege kerek, bu kibi areketler videoğa çekilse, minnetdar olurmız. Olarnı uquq qoruyıcılarğa bermege rica etemiz, ştabğa bildirmek. Telefonım er vaqıt açıq, Rada saytında o bar. Muracaat olsa, vatandaş aqlarınıñ er bir bozuluvına seslenecegim», – dey deputat.
İnsan aqları boyunca Qırım alan eyyetiniñ temsilcileri oktâbr 6 künü Herson vilâyeti «Çonğar» kiriş noqtası rayonında teşkerüvni keçirdi. Malümatqa köre, neticede nice bozuluv qayd etildi. Uquq qoruyıcılar deyler ki, uquq qoruyıcı organlarınıñ temsilcileri olmağan silâlı insanlar maşina aydavcılarını salonlarını açmağa ve vesiqalarnı köstermege mecbur eteler.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
