Link açıqlığı

Aqmescitniñ qırımtatarlarnıñ toplu yaşağan Aq-Meçet qasabası uquq qoruyıcılar tarafından sarıp alınğan, soqaqlarda politsiya ve OMON hadimleri tura.

Qırım.Aqiqat bildirgeni kibi, sabadan uquq qoruyıcılar ev-evge yüre, malümatlarnı yazıp ala, telefon nomeralarını qayd ete, vesiqalarnı teşkerler.

Sakinler dey ki, evel bu areketler Qırım tibbiyet adamlarınıñ öldürüvinde şeklengen şahısnıñ qıdıruvı ile bağlay ediler. Şimdi ise bu areketlerni iç te añlatmaylar.

«Rayonımızda eki kündir yerli tükânlar çalışmay, ötmek bile satmaylar, şeerge barmağa mecburmız. İş adamları politsiyağa rastkelmege istemey. Bu, ğaliba, tatarlarğa qamaçav ve Rusiyege nefreti içün intiqamdır», – dedi Qırım.Aqiqatqa yerli sakinlerden biri.

İnsanlar deyler ki, qasabada kergin vaziyet üküm süre.

Bu aqta Qırımnıñ uquq qoruyıcı organlarından resmiy izaat yoq.

Aqmescitte acele yardım stantsiyasınıñ hadimlerine ücüm etken şahısnı qıdırğan uquq qoruyıcılar «Yağmurça» («Fontanı») qasabasında teşkerüvlerni keçirgen edi.

Sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.

Qırım boyunca Rusiye Federatsiyasınıñ Taqiqat komitetiniñ baş idaresi Rusiye Cinaiy Kodeksiniñ 105 maddesi 2-nci qısmına binayen cinaiy işni açtı (eki ve ziyade insannıñ öldürilmesi).

Sentâbr 29 künü Rusiye İçki işler nazirligi şeklengen insannıñ bulunuv yeri aqqında bildirgen insanğa 500 biñ ruble vade etti.

XS
SM
MD
LG