Qırımtatarlar Qırım territoriyasında milliy-territorial muhtariyetniñ teşkil etilmesi aqqında degil de, onıñ ğayrıdan tiklevi aqqında ayta. Qırım.Aqiqatqa qırımtatarlarnıñ yetekçisi, Ukraina halq deputatı Mustafa Cemilev aytqanı kibi, söz Qırım qırımtatarlarnıñ 1944 senesi sürgünliginden evel nasıl olğanı aqta kete.
«Evel, sürgünlikten evel olğanı aqqında aytamız – milliy-territorial muhtariyetniñ tiklenmesi aqqında. Tamır halqı diger milletlerge köre daa da çoq aqlarğa saip olacaq dep aytmaymız. Milliy-territorial muhtariyet olğanı sebebinden anda tamır halqınıñ aqlarını qoruv mehanizmi olmalı», – dey o.
Cemilevniñ sözlerine köre, bu, ilk nevbette, tamır halqı tiliniñ qullanılması ve akimiyet strukturalarında temsilciliginiñ olması.
Qırım Muhtar Sovet Sotsialistik Cumhuriyeti – Qırım territoriyasında Rusiye imperiyasınıñ sabıq Tavriya güberniyasınıñ qısmından teşkil etilgen cumhuriyet.
Ukraina prezidenti Petro Poroşenko yañı Anayasa leyhasını izaatlap, Qırım Muhtar Cuhuriyet statusını saqlaycağını qayd etti. Şunı da aytqan edi ki, Ukraina qırımtatarlarğa borclu ve yarımada territoriyasında qırımtatar halqınıñ «milliy-territorial muhtariyeti» tiklenecek.
