Qırımnıñ rusiyeli Devlet şurasınıñ başı Vladimir Konstantinov Herson vilâyeti tarafından faallerniñ Qırımğa malnıñ ketirüv qamaçavı boyunca vatandaşlıq aktsiyasını «cinayet» olaraq adladı.
Bunı o oktâbr 6 künü Qırım parlamentiniñ prezidiumı toplaşuvında bildirdi, haber ete matbuat hızmeti.
«Qamaçav, ölüm tilegi – cinayetke çağıruv degil de, genotsid havfı. Faşist qanunsız teşkilâtlarnıñ aqiqiy tüşünceleri, olar bundan utanmaylar. Cinaiy maqsatları – halqnı yoq etmek», – dep bildire Konstantinovnıñ sözlerini matbuat hızmeti.
Qırımnıñ rusiyeli prokuraturasını «ukrain siyasetçileriniñ areketlerine qıymet kesmege» çağırdı.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
