Link açıqlığı

Qırım musulmanlarınıñ müftisi Meclisten çıqarılacaq – Cemilev


Yaqın vaqıtta Qırımtatar Milliy Meclisi temsiliy organnıñ erkânından Qırım musulmanlаrınıñ müftisi Emirali Ablayevniñ çıqarılması aqqında qarar alacaq.

Bunı Qırım.Aqiqatqa qırımtatar halqınıñ yetekçisi, halq deputatı Mustafa Cemilev, onıñ Emirali Ablayevniñ Ankarada Meclis reisi Refat Çubarov ile körüşüvinden soñ olğan mevamına munasebeti ile bağlı sualge cevap bergende ayttı.

«Menimce, Qırımtatar Milliy Meclisi yaqın vaqıtta Emirali Ablayevniñ Meclis erkânından çıqarılması aqqında qarar alır, çünki o işğalci akimiyetiniñ ellerinde oyuncaq oldı, yazıq ki», – dey Cemilev.

​Qırım.Aqiqat Qırım musulmanlarınıñ müftisi Emirali Ablayevniñ qırımtatar halqınıñ yetekçisi Mustafa Cemilevniñ aytqanı boyunca olğan izaatını almağa tırışa.

2015 senesi avgustnıñ soñunda Ankarada Meclis başı Refat Çubarovnıñ Qırım musulmanları müftisi Emirali Ablayev ile körüşüvi keçti. İşbu körüşüvniñ neticeleri iştirakçileri tarafından farqlı tarzda añlatıldı. Çubarov Ablayev ile mündericeli subet olğanını qayd etti, soñkisi ise «qırımtatar halqınıñ Qırımdaki vaziyeti boyunca muayyen teklifler olmağanını» bildirdi. Rusiye tarafı Çubarov ve onıñ yardımcıları müftiy eyyetine ücüm etkenini bildirgen edi.

XS
SM
MD
LG