Link açıqlığı

Halqara ekspert: dünyada qırımtatarlar aqqında ne dereсede az bilseler, o derecede aqlarını qourmağa da qıyın ola


Dünya toplulığı qırımtatarlarnıñ medeniyeti ve tarihı aqqında az bilgeni sebebinden cemiyet içün Qırım işğalini doğru añlamaq ve yarımada tamır halqı – qırımtatarlarnıñ aqlarını qorumaq kibi meselelerde mania peyda ola, dep bildire BMT insan aqları boyunca daimiy forumınıñ prezident muavini, finn-ugorlarnıñ halqara areketiniñ faali, leyhanıñ baş eksperti Oliver Loode.

Bunı o oktâbr 6 künü Kiyevde keçirilgen matbuat konferentsiyasında bildirdi.

«BMT tamır halqları meseleleri boyunca daimiy forumda çalışqanda, dünya qırımtatar halqı – tamır halqı olğanı aqqında bilmegenini añladım. Bu tek qanunsız işğal ve şimdiki adiselerge bağlı degil, temel şeylerge ait – qırımtatarlar kimdir, medeniyetiniñ hususiyeti nededir. Bu bilgilersiz şimdi ne olğanını añlamağa qıyın», – dey Loode.

Onıñ fikrine köre, «dünya qırımtatarlar aqqında ne derecede az bilse, olarnıñ aqlarını da o derecede qorçalamağa qıyn ola».

Qırımtatar halqınıñ milliy yetekçisi Mustafa Cemilev de bu fikirge qol tuta.

«İşğal nasıl keçti ve qırımtatar halqı nasıl vaziyetke oğradı, dünya bunı bilmey, bütün mesele şundadır», – dey Cemilev.

Estoniya Tış işler nazirligi «Qırımtatarlarnıñ aq-uquqlarını alem-aşkâre diplomatiya usulları ile qoruv» leyhasınıñ amelge keçirilmesine 105 biñ yevro ayıracaq.Leyha maqsadı – halqara cemaatçılıqnı qırımtatarlar aqqında haberdar etmek.

XS
SM
MD
LG