Estoniya Tış işler nazirligi «Qırımtatarlarnıñ aq-uquqlarını alem-aşkâre diplomatiya usulları ile qoruv» leyhasınıñ amelge keçirilmesine 105 biñ yevro ayıracaq.
Bu aqta oktâbr 6 künü Kiyevde keçirilgen matbuat konferentsiyasında BMT insan aqları boyunca daimiy forumınıñ prezident muavini, finn-ugorlarnıñ halqara areketiniñ faali, leyhanıñ baş eksperti Oliver Loode bildirdi.
«Leyha maqsadı – halqara cemaatçılıqnı qırımtatarlar aqqında haberdar etmek. Ekinciden – tamır halqı olğan qırımtatarlarğa qol tutuv meselesinde dost ve şeriklerni tapmaq. Üçünciden – estoniyalılarnıñ soñ on yıl içerisinde halqara kommunikatsiya ve diplomatiya saasında qazanğan tecribesi ile paylaşmaq», – dey ekspert.
Onıñ sözlerine köre, leyha çerçivesinde Avropa memleketlerinde kösterilecek sergi azırlanacaq, Avropa telekanallarında kösterilecek video malümatları toplanılacaq, körüşüv ve seminarlar teşkil etilecek. Çeşit usullar ile qırımtatarlar, tarihı, medeniyeti, Qırmdaki şimdiki yaşayışı aqqında tarif etecekler.
«Qırımtatar halqı nasıl bir vaziyetke tüşkeni ve qırımtatarlar kim olğanı aqqında promo-roliklerniñ teşkil etilecegi aqqında söz kete. Bu sergi Ğarp memleketleri boyunca seyahat etecek, ve, ümüt etemiz ki, BMT çerçivesinde taqdim etilecek. Ümüt etemiz, dünya cemaatçılığı halqnıñ vaziyeti aqqında daa da ziyade haberdar olur», – qayd etti leyha idarecisiEmine Ceppar.
Qırımtatarlarnıñ milliy yetekçisi, Ukraina prezidentiniñ qırımtatar halqınıñ işlerinden vekâletlisi Mustafa Cemilev işbu leyhağa müsbet qıymet kesti: «Qırım meselesiniñ aydınlatuvında ve Ukraina topraq bütünliginiñ teminlevinde mezkür leyhanıñ emiyeti büyük».
Matbuat-konferentsiyasınıñ iştirakileri bildirgeni kibi, yaqın vaqıtta leyha inkişafınıñ yol haritası işlep çıqarılacaq. Strategiya üzerinde komanda çalışacaq, şu sırada Qırımtatar Milliy Meclisiniñ temsilcileri de. Leyha 2015 senesi sentâbrde başlandı ve 2017 senesi avugst ayına qadar devam etecek, deyler teşkilâtçılar.
