Link açıqlığı

Siyasetşınas: qırımtatar cumhuriyeti aqqında billboardlаrda Ukraina topraq bütünligine telüke yoq


Qırım kirişinde qırımtatar muhtariyetine davet ile billboardlar qırımtatarlarnıñ destek işaretidir. Bunı Qırım.Aqiqatqa siyasetşınas, Free Crimea leyhasınıñ mefkürecisi Taras Berezovets bildirdi.

«Bunı çoqusı begenmey, bilem, amma qırımtatarlarnıñ destek işareti olaraq – adiy bir şey ve Qırımda ve Qırımdan çıqqan Ukraina vatanperverleri bu sebepten qavğalaşmamaq kerek», – dey o.

Siyasetşınasınıñ aytqanı kibi, billboardnı cemaatnı qırımtatarlarnıñ milliy muhtariyeti olacağına azırlamaq maqsadı ile qoymağanlar.

«Qasevet içün sebep körmeyim. Çünki akimiyet bugün Qırımda qırımtatarlarnıñ milliy muhtariyetini meydanğa ketirmek ğayesine qol tuta. Ukraina prezidenti şu ğaye tarafdarıdır. İnsanlarğa bu muhtariyetniñ ilân etilmesinde iç bir telüke olmağanını añlatmaq kerek», – dey Berezovets.

O şunı da qayd etti ki, bugün qırımtatarlar «Qırımnıñ halqara mevzuatına qaytarılması oğrunda Ukraina devleti yerinde» büyük işni yapa.

Ukraina Adliye nazirliginde bu kibi billboardnıñ qoyulmasını izaatlamaylar.

«Tafsilâtlarnı bilmeyim, onıñ içün izaatlamaycam… bunı nasıl ettiler, kim ve qayda bunı yazdı», – dedi Qırım.Aqiqatqa adliye naziriniñ muavini Sergey Petuhov.

Herson vilâyeti Qırım kirişindeki «Çonğar» kiriş noqtasında yarımadanıñ vatandaşlıq qamaçavınıñ iştirakçileri Ukraina. Qırımtatar Muhtar Cumhuriyeti. Hoş keldiñiz!» yazısı ile billboardnı yerleştirdiler.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

XS
SM
MD
LG