Link açıqlığı

Saatnıñ esas haberi

Cemilev: Qırımnıñ «eneregetik» qamaçavı ile bağlı mesele oktâbrniñ soñuna qadar çezilir


Ukraina Yuqarı Şurasınıñ deputatı, qırımtatarlarnıñ milliy yetekçisi Mustafa Cemilev dey ki, Qırımnıñ «eneregetik» qamaçavı ile bağlı mesele oktâbrniñ soñuna qadar çezilir.

Bunı o Kiyevde oktâbr 6 künü jurnalistlerge bildirdi, haber ete Qırım.Aqiqat mühbiri.

Şu cümleden, Qırım qamaçavınıñ iştirakçileri elektrik energiyasınıñ aqımını qapatacaqmı degen sualge Cemilev: «Menimce, bu sual aynıñ soñuna qadar al etilir» dep cevap berdi.

«Prezidentniñ serbest iqtisadiy zona aqqında qanunnı lâğu etmek avalesi qabul etilir, dep ümüt etemiz, ve o zaman biz degil de, devlet blok eter», – dedi o.

Evel Qırımtatar Milliy Meclisiniñ başı Refat Çubarov Qırımnıñ «erzaq» qamaçavından soñ energetik qurşavı ola bilecegi aqqında bildirgen edi.

Salı künü, oktâbr 6-da, Herson vilâyetiniñ İçki işler nazirligi idaresiniñ başı muavini İlya Kiva bildirgeni kibi, Qırımğa elektrikanı bergen tiremeniñ bozğanlar.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG