Qırım Rusiye Federatsiyasınıñ uquqiy alanına keçkeninden soñ, bir on qırımtatarı Rusiye taqiqatı altında buluna, daa yedisi endi apiste yata, Qırımtatar Milliy Qurultayınıñ Merkeziy saylav komissiyasınıñ başı Zair Smedlâyev.
Bunı o oktâbr 6 künü Qırım.Aqiqat Radiosınıñ saba efirinde bildirdi.
Aytqanı kibi, vatandaşlarına nisbeten cinaiy işlerniñ esas qısmı sebepsizdir.
«Er angi işniñ delilleri sebepsizdir. «Mayıs 3» işi boyunca qabaatlar – akimiyet temsilcilerine küç qullanuvı, o vaqıt ise atta Rusiye qanuniyeti çerçivesinde kimse akimiyetni temsil etmegen edi… Şunıñ içün bu areketler ufaq yaramazlıq kibi añlatıla bile edi», – dedi Smedlâyev.
2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini noyabr 19-na qadar arttırdılar.
«Mayıs 3» işi de keçken sene adiselerine bağlı, o vaqıt qırımtatarlar Rusiye tarafından Qırım kirişi yasaqlanğan qırımtatar milliy yetekçisi Mustafa Сemilevni Ermeni Bazarğa qarışılamağa çıqqan ediler, bundan soñ aktsiya iştirakçilerine nisbeten cinaiy işler açılmağa başlandı.
