Ukrainanıñ birinci prezidenti Leonid Kravçuk dey ki, Ukraina ve dünya Qırımnıñ Rusiyege «qoşuluvını» iç bir vaqıt tanımaz. Fikrine köre, Qırım «boz zonada bulunıp, Ukrainağa bağlanğan «qara çuqur» olur».
Bunı Kravçuk «Novoye vremâ» neşirine bildirdi.
Qırımnıñ vatandaşlıq qamaçavına qol tutqanını da qayd etti.
«Suvnıñ 70 % yarımadağa qıtadan ketirile, elektrik energiyası, ve, hucur olsa da, erzaqnıñ bir qısmı. Meraqlı bir mevam. Beş ay devamında Ukrainadan Qırımğa yarım milliard dollar miqdarında aşayt malı ketirildi. Demek, Ukraina işğalci akimiyet içün erzaqnı ketire. Kimni aşatamız? İşğalcilerni», – dey Kravçuk.
«Bu aktsiya umummilliy olsa, qırımlılar Ukrainasız vaziyetleri qıyın olacağını añlar», – dey o.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
