Link açıqlığı

Qırım qamaçavı boyunca vatandaşlıq aktsiyası başlağanından soñ, yarımadağa kiriş ve çıqışında vatandaşlarnıñ sayısı eksildi. Bunı Qırım.Aqiqatqa Herson vilâyet militsiyası reberiniñ muavini İlya Kiva bildirdi.

«Ebet, azlaştı (kirgen/çıqqanlarnıñ sayısı – QA). Şimdi er bir maşinadan er bir insannı teşkerip baqalar. Er bir maşina qoşma nezaretten keçe, ebet, duşmanğa barmağa istegenlerniñ sayısı eksile», – dedi o.

Aqım ne derecede azlaştı, bildirmedi. İşbu malümatnıñ diger qaynaqlardan tasdiqlavı yoqtır.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG