Link açıqlığı

Saatnıñ esas haberi

İslâmov: Qırım ile memuriy sıñırda billboardlar qırımtatarlarnıñ ruhunı köterecek


Qırım qamaçavınıñ teşkilâtçılarından biri, ATR telekanalınıñ saibi Lenur İslâmov dey ki, yarımada kirişinde nezaret-kiriş noqtalarında qırımtatar muhtariyetine davet ile yerleştirilgen billboardlar sıñırdan keçken qırımtatarlarnıñ ruhunı köterecek.

Bunı o Qırım.Aqiqatqa bildirdi.

«Qırımğa yol alğan ve Ukrainanı söggen «vata» Ukraina Qırımda yaşağan serbest insanlarğa qol tutqanını añlamaq kerek. Şunıñ içün «vatanı» bu billboardlar açuvlatacaq, qırımtatar halqınıñ ise ruhu köterilecek», – dey İslâmov.

Billboardlarda yazılğan metnler ile, aytqanı kibi, qamaçav iştirakçileri ukrain devleti Qırım tamır halqı – qırımtatarlarnıñ – Ukraina terkibinde öz muhtaretiniñ olması ile bağlı aqqını qanuniy seviyede qabul etecek zamanını yaqınlaştıra.

Herson vilâyeti Qırım kirişindeki «Çonğar» kiriş noqtasında yarımadanıñ vatandaşlıq qamaçavınıñ iştirakçileri Ukraina. Qırımtatar Muhtar Cumhuriyeti. Hoş keldiñiz!» yazısı ile billboardnı yerleştirdiler

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler. Afta devamında Qırım ile memuriy sıñırdan bir yük maşinası bile keçmedi.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG