Link açıqlığı

Silâlı ücümden soñ sağ qalğan ekim acele yardımdaki işine devam etecek ola


Rusiye neyrohirurgları birliginiñ başı Aleksandr Konovalov dey ki, Aqmescitte keçken raatlıq künleri olğan silâlı ücüm neticesinde elâk olğan feldşerni Moskvağa avuştırmağa acet yoq. Zarar körgen erkek, olğan vaqiağa baqmadan, «acele» yardımdaki işine devam etmege istey.

Bu aqta Qırımnıñ rusiyeli ükümetiniñ sağlıq saqlav nizirliginiñ beyanatında aytıla.

«Onıñ alı stabildir, çoq şükür, havfsızdır. Bütün zaruriy yardım kösterilgen, tedaviylev ve nezaretni devam ettirmek kerek. Yüz sıñırına zarar ketirildi, amma bundan ayatına telüke yoq. Kesir qalğandır, qafağa yetmedi, şükür, miyi yaralanmadı», – dey Konovalov.

Qırımğa Rusiyeden kelgen ekimler zarar körgen insannıñ yahşı olayatqanını qayd eteler.

«Hasta tedaviylene, baş miyiniñ yaralanuvı qayd etilmegen – pek yahşı köstergiçtir. Menimce, bir qaç künden ayaqqa turar ve özüni yahşı is etecektir», – dedi Rusiye Federatsiyasınıñ Sağlıq saqalv nazirliginiñ baş neyrohirurgı Vladimir Krılov.

Zarar körgen feldşer «acele» yardımda işine devam etmek niyetindedir.

«Bu aqta iç te laf olmamalı, «acele» yardımda işime, şübesiz, devam etecem», – dey yaralanğan Vladimir Slonçak.

Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.

Qırım boyunca Rusiye Federatsiyasınıñ Taqiqat komitetiniñ baş idaresi Rusiye Cinaiy Kodeksiniñ 105 maddesi 2-nci qısmına binayen cinaiy işni açtı (eki ve ziyade insannıñ öldürilmesi).

Sentâbr 29 künü Rusiye İçki işler nazirligi şeklengen insannıñ bulunuv yeri aqqında bildirgen insanğa 500 biñ ruble vade etti.

XS
SM
MD
LG