Qırımtatar muhtariyeti aqqında billboardlar Qırım ile memuriy sıñırda bütün kiriş noqtalarında peyda olacaq.
Bunı Qırım.Aqiqatqa Qırım qamaçavınıñ teşkilâtçılarından biri, ATR telekanalınıñ saibi Lenur İslâmov bildirdi.
Onıñ aytqanı kibi, «Çonğar» kiriş noqtasında billboardlarnı Qırım qamaçavınıñ iştirakçileri öz esabına yerleştirdiler. Yazıları ukrain ve qırımtatar tillerinde yazılğan.
«İşğal etilgen ve serbest territoriyalar arasındaki bitaraf zonasında eki boş billboard olğanını qayd ettik. «Çonğar»da insanlar 4,5 km cayav kete. O taraftan insanlarnı maşina ile alıp ketireler, ukrain tarafından cayav ketmege mecburlar. İnsanlar ketkende, baqılmağan territoriyanı köre, kesilmegen ot, eki totlu billboardnı köreler. Bugünden, Qırımdan çıqqanda – «Sizni serebst Ukraina selâmlay», Qırım yarımadasına kirgende, Ukraina terkibinde qırımtatar milliy cumhuriyeti olğan territoriyağa ketkenleri aqqında yazını oquylar», – dey o.
İslâmovnıñ sözlerine köre, ileride billboardlar Herson vilâyetiniñ «Çaplinka» ve «Kalançak» kiriş noqtalarında peyda olacaq.
Herson vilâyeti Qırım kirişindeki «Çonğar» kiriş noqtasında yarımadanıñ vatandaşlıq qamaçavınıñ iştirakçileri Ukraina. Qırımtatar Muhtar Cumhuriyeti. Hoş keldiñiz!» yazısı ile billboardnı yerleştirdiler
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler. Afta devamında Qırım ile memuriy sıñırdan bir yük maşinası bile keçmedi.
