Ukraina prezidentiniñ qırımtatar halqınıñ işlerinden vekâletlisi, qırımtatarlarnıñ milliy yetekçisi Mustafa Cemilev Kiyevde Almaniya ükümetiniñ çeşit nazirlikleriniñ devlet kâtipleri ile körüşti ve olarnen Qırım vaziyetini muzakere etti.
Bunı Cemilevniñ matbuat hızmeti bilidre.
Matbuat hızmetinde bildirilgeni kibi, eyyet Kiyevde oktâbr 1-2 künleri Ukraina temsilcileri ile eki taraflama muzakerelerni keçire.
«Ziyaret çerçivesinde Federal tış işler nazirliginiñ devlet kâtibi Stephan Steinlein Mustafa Cemilev efendi ile körüşti. Körüşüv devamında memleket ve işğal etilgen Qırım vaziyeti muzakere etildi», – denile beyanatta.
Bundan evel Mustafa Cemilev AQŞ BMT Baş assambleyasında ukrain eyyetiniñ erkânında buluna edi.
Qırım Rusiye tarafından 2014 senesi fevral 20 künü işğal etilgen. Ukraina Yuqarı Şurası bu tarihnı yarımadanıñ muvaqqat işğaliniñ başlanuvı olaraq belgiley.
