Qırımnıñ iç siyaseti, haber ve alâqa naziri Dmitriy Polonskiy aytqanı kibi, Qırım temsilcileriniñ ОSCE Demokratik institutlar ve insan aqları boyunca bürosınıñ konferentsiyasında iştiraki «Qırımnıñ Rusiye Federatsiyası ile birleşüvi aqqında doğru malümatnıñ aşkâr etilmesine» imkân yarata.
Bu aqta Polonskiy «Krım» radiosınıñ efirinde bildirdi, haber ete Qırım ükümetiniñ matbuat hızmeti.
«Tedbirniñ bir çoq iştirakçisi içün aytqanımız yürekke qılıç kibi kele. Çünki bu aqiqatnı uzun vaqıt devamında bildirmey ediler. Yani, tüşünip baqıñ, insanlarnıñ çoqusı Qırım vaziyeti aqqında iç bir doğru sözni eşitmey edi. Şu sebepten bizim içün ОSCE konferentsiyasında iştirakimiz – Avropada yaşağan insanlarğa Qırımda 2014 senesi mart ayında aqiqaten ne olıp keçkeni aqqında doğru malümatnı bildirmek imkâniyettir», – dey Polonskiy.
Qırımnıñ iç siyaseti, haber ve alâqa naziri Dmitriy Polonskiy Varşavada keçirilgen OSCE toplaşuvında iştirak ete. Onıñ sözlerine köre, OSCEniñ nevbetteki toplaşuvında «Qırımnıñ Rusiye cemiyeti» teşkilâtını prezidium azası olaraq temsil ete.
Poloniyada Ukraina elçihanesi Polonskiyniñ Varşavağa kelmesini «Kremlniñ provokatsiyası ve halqara uquqnıñ bozuluvı» olaraq adladı.
Poloniya Tış işler naziri Grzegorz Schetyna aytqanı kibi, Poloniya Qırımnıñ rusiyeli ükümetiniñ baş nazir muavini Dmitriy Polonskiyni memleketke yañılıp kirsetti.
