Link açıqlığı

Aqmescit «atıcını» qıdırıp, politsiya hadimleri Yağmurça qasabasınıñ sakinleri aqqında malümatnı yazıp ala


Aqmescitte acele yardım stantsiyasınıñ hadimlerine ücüm etken şahısnı qıdırğan uquq qoruyıcılar şeerge yaqınlaştı – qırımtatarlarnıñ toplu yaşağan «Yağmurça» («Fontanı») qasabasına kelip yettiler.

Qırım.Aqiqat mühbiri bildirgeni kibi, qasabağa yetken 60 let Oktâbrâ soqağında şimdilik silâlı insanlar tura.

Bundan da ğayrı, hadimler ev-evge yüre. Politsiya hadimleri «Yağmurça» sakinlerine Bekir Nebiyevniñ fotosüretini köstere ve insanlardan onıñ aqqında malümatnı ögrenmege tırışalar. Bunıñ ile uquq qoruyıcı organlarnıñ hadimleri er şahsiy evde yaşağanlar aqqında, çağına yetmegen balalar aqqında da, şu cümleden, malümatnı yazıp alalar.

Bunı ne maqsat ile yapalar kibi sualge cevap bermeyler.

Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.

Qırım boyunca Rusiye Federatsiyasınıñ Taqiqat komitetiniñ baş idaresi Rusiye Cinaiy Kodeksiniñ 105 maddesi 2-nci qısmına binayen cinaiy işni açtı (eki ve ziyade insannıñ öldürilmesi).

Sentâbr 29 künü Rusiye İçki işler nazirligi şeklengen insannıñ bulunuv yeri aqqında bildirgen insanğa 500 biñ ruble vade etti.

XS
SM
MD
LG