Qırımnıñ iç siyaseti, haber ve alâqa naziri Dmitriy Polonskiy, ve Qırımnıñ rusiyeli ükümetiniñ diger azalarını sanktsiyalar cevdeline kirsetmek kerek, dedi Qırım.Aqiqatqa Poloniya Cumhuriyetinde Ukraina elçisi Andrey Deşçitsa.
Onıñ aytqanı kibi, Poloniya Cumhuriyetinde Ukraina elçihanesi Polonskiyniñ Varşavağa kelmesi boyunca mutanesip bildirüvni azırladı, amma oña çetelge çıqışnı da yasaq etmek kerek.
«Menimce, em de Polonskiy, em de Qırım «ükümetiniñ» diger azalarınıñ faaliyetini taqiq etmek, cinaiy işlerni açmağa ve olarnı sanktsiyalar cedveline kirsetmek kerek, Qırımdan, faaliyetlerinden sebep, çıqıp olamasınlar», – dey Andrey Deşçitsa.
O dey ki, Polonskiy Poloniyağa, soyadınıñ yazılışında bir qaç arifni deñiştirip, Rusiye diplomatik pasportı boyunca kirdi.
Qırımnıñ iç siyaseti, haber ve alâqa naziri Dmitriy Polonskiy Varşavada keçirilgen OSCE toplaşuvında iştirak ete. Onıñ sözlerine köre, OSCEniñ nevbetteki toplaşuvında «Qırımnıñ Rusiye cemiyeti» teşkilâtını prezidium azası olaraq temsil ete.
Poloniyada Ukraina elçihanesi Polonskiyniñ Varşavağa kelmesini «Kremlniñ provokatsiyası ve halqara uquqnıñ bozuluvı» olaraq adladı.
Poloniya Tış işler naziri Grzegorz Schetyna aytqanı kibi, Poloniya Qırımnıñ rusiyeli ükümetiniñ baş nazir muavini Dmitriy Polonskiyni memleketke yañılıp kirsetti.
