Qırımnıñ rusiyeli ükümetiniñ baş nazir muavini Dmitriy Polonskiy dey ki, Milliy azlıqlar işleri boyunca ОSCE yuqarı komissarı Astrid Turs reberliginde keçken sessiya çerçivesinde çıqışta bulunmasına keder etmek içün konferentsiya ayatlarında üstüne qave tökken ekenler.
Qırımnıñ rusiyeli ükümetiniñ «ruporı» Krıminform saytı bildirgeni kibi, ziddiyetten evel Polonskiy neşirlerden birine intervyü bergen edi.
«Yanımda Ukraina Tış işler nazirliginiñ şamatalı sabıq başı, şimdi Poloniyada Ukraina elçisi Andrey Deşçitsa ukrain telekanallarından biriniñ çıqaruv taqımı ve ellerinde qavesi olğan bir genç ile peyda oldı. İntervyüden son Polonskiy salonğa yol aldı, amma aynı şu vaqıtta genç yanından keçip, sanki tesadufen baş nazir muaviniñ üstüne qave tökti», – denile beyanatta.
«Şübesiz, ukrain diplomatiyasınıñ ve onıñ eñ eyi temsilcilerinden birisiniñ ğalebesidir. Teessüf ki, OSCE konferentsiyasınıñ seviyesi aqqında ayta, böyle «tüşünilgen» tarikler yapılğan olsa», – dey Polonskiy.
Poloniyada Ukraina Elçiliginiñ saytında bu aqta iç bir izaat yoq.
Poloniyada Ukraina elçiligi Polonskiyniñ Varşavağa kelmesini «Kremlniñ provokatsiyası ve halqara uquqnıñ bozuluvı» olaraq adladı.
Poloniya Tış işler naziri Grzegorz Schetyna aytqanı kibi, Poloniya Qırımnıñ rusiyeli ükümetiniñ baş nazir muavini Dmitriy Polonskiyni memleketke yañılıp kirsetti.
