Link açıqlığı

Saatnıñ esas haberi

Meclis «acele» yardımğa etilgen ücüm aqqında: cinayetniñ milleti yoq


Qırımtatar Milliy Meclisi Aqmescitte acele yardım hızmetiniñ elâk olğan hadimleriniñ tuvğanlarına taziyelerini bildire ve regional meclislerge cinayetçi aqqında er angi malümatnı uquq qoruyıcılarğa bildirilmege avale ete.

Meclis reisiniñ birinci muavini Nariman Celâl degeni kibi, bu facia «jurnalistler, «ekspertler» tarafından aselet Qırımda milletlerara ziddiyetni doğurmaq içün qullanıla». Qatilniñ «slavân olmağanına» ve onıñ, vaqiağa alâqası iç te olmağan, soy-sop bağlarına diqqat etmege tırışalar.

«Uquq qoruycılarnı bu ameliyatnı toqtatmağa çağıram, qırımtatarlarğa kelgende, mıtlaqa milletini aytalar, nasıldır bir manaçıq ve neticelerni uyduralar. İnsan kerçekten de bir de bir cinayetni etse, qanunğa köre, cinayetçidir, cezasını körmeli», – dey Nariman Celâl.

Qırımda Nebiyevler qorantası açıq mektüp vastası ile «acele yardım» stantsiyasında aile başı Bekir Nebiyevniñ ellerinden açılğan atış neticesinde elâk olğan ekimlerniñ qorantalarından afu soradı.

Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.

Qırım boyunca Rusiye Federatsiyasınıñ Taqiqat komitetiniñ baş idaresi Rusiye Cinaiy Kodeksiniñ 105 maddesi 2-nci qısmına binayen cinaiy işni açtı (eki ve ziyade insannıñ öldürilmesi).

Sentâbr 29 künü Rusiye İçki işler nazirligi şeklengen insannıñ bulunuv yeri aqqında bildirgen insanğa 500 biñ ruble vade etti.

XS
SM
MD
LG