«Qırımnıñ vatandaşlıq qamaçavı» aktsiyasınıñ teşebbüsçisi, iş adamı Lenur İslâmov aytqanı kibi, belgisiz şahıslar onı qorquza ve «Ukrainian Chemical Products» zavodına demir yolunıñ qamaçavını toqtatmağa talap eteler.
Bunı o Qırım.Aqiqatqa bildirdi.
«Başıñızğa belâ olacaq dep telefon etken ediler. Kiyevde sizge keder etecek çoq insan bar kibi laf aytılğan edi. Qorquzuv. Meni öldürersiz, beden zararı olurmı, deyim. Bunıñ da olması mümkün, deyler», – dep bildire İslâmov.
Onıñ sözlerine köre, oña telefon etken insanlar özlerini «Firtaşnıñ yardımcıları» olaraq tanıtqanlar. İslâmov subetdeşleri aqiqaten kim olğanını bilmegenini bildirdi, çünki telefonı nomeranı belgilemedi.
Zavodnıñ saibi Groop DF şirketi bu malümatnı izaatlamadı.
«Öşek, hayal ve olmağan şeylerni izaatlamaymız», – dedi şirketniñ reisi Oleg Arestarhov.
«Qırımnıñ vatandaşlıq qamaçavı» aktsiyasınıñ iştirakçileri qıtaiy Ukrainadan «Ukrainian Chemical Products» şirketine qadar olğan demir yolunı blok ettiler. Qırımnın rusiyeli başı Sergey Aksenov degeni kibi, işbu şirketniñ yedegi daa bir ayğa yeter.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler. Afta devamında Qırım ile memuriy sıñırdan bir yük maşinası bile keçmedi.
