Qırım ve Aqyar müftisi hacı Emirali Ablayev Aqmescitte «acele» yardımğa etilgen ücüm neticesinde elâk olğan ekimlerniñ ailelerine taziyelerini bildirdi ve nasıldır bir malümatnı bilgenlerni şeklengen Bekir Nebiyevniñ qıdırıluvında yardımcı olmağa çağırdı.
İşbu metn sentâbr 20 künü Qırım Musulmanları Diniy İdaresi saytında aşkâr etilgen.
«Yardım etmege çaresi olğan ve nasıldır bir malümatnı bilgen insanlarnı çette qalmamaq ve tek taqiqatqa degil de, bu insanğa da yardım etmege çağıram. Özü teslim olunsa, onıñ içün daa eyisi olur, cezasını körip yaşamağa fırsatı olur», – denile muracaatta.
Emirali Ablayev vaqianı siyasetleştirmemek çağırdı ve facia milletlerara munasebetlerge tesir etmemek kerekligini qayd etti.
«Şübesiz ki, büyük günâh, insan em bu, em ebediy dünyada mıtlaqa cezasını körecek. Amma, cemaatçılıqqa muracaat etip, kene şunı qayd etmege isteyim, işbu vaqia Qırım sakinleriniñ milletlerara, dinlerara munasebetelerine tesir etmemeli. Cinayet ne din, ne milletke bağlı degil. Bu kibi müthiş cinayetni tek ruhiy alı bozulğan insan yapa bile», – dey müfti.
Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.
Qırım boyunca Rusiye Federatsiyasınıñ Taqiqat komitetiniñ baş idaresi Rusiye Cinaiy Kodeksiniñ 105 maddesi 2-nci qısmına binayen cinaiy işni açtı (eki ve ziyade insannıñ öldürilmesi).
Sentâbr 29 künü Rusiye İçki işler nazirligi şeklengen insannıñ bulunuv yeri aqqında bildirgen insanğa 500 biñ ruble vade etti.
