Qırımnıñ rus ükümetiniñ iç siyaseti, informatsiya ve alâqa naziri, baş nazir muavini Dmitriy Polonskiy dey ki, OSCEde çıqışta bulunıp, Qırımdaki vaziyet aqqında Demokratik institutlar ve insan aqları boyunca büro maruzasını tenqit etti.
Qırımnıñ rus ükümetiniñ «ruporı» Krıminform saytı bildirgeni kibi, Polonskiy Qırımnıñ Ukraina terkibinde yigirmi yıllıq bulunğanını «qanunsız», Qırım yarımadasını – «rus toprağı» olaraq adladı. Bu sebepten, onıñ fikrine köre, «2014 senesi umumqırım referendumınıñ neticelerine itiraz bildirmege acet yoq».
Polonskiy dey ki, Qırım vaziyeti aqqında esabat – «120 saifelik yalan, uydurılğan malümat, isbatlanmağan qabaat»tır. Ve «dünya toplulığına Rusiyeden memlekette yaşağan er bir millet vekilleri arasında musaviylik olğanını ögrenmege kerek» dey.
Aytqanı kibi, Qırımda 175 millet vekili yaşay, Qırımnıñ sürgün etilgen halqlarnıñ aqları yuridik ceetten kefil etilgen, üç til devlet tilidir, hristian ve musulman bayramları raatlıq künleri olaraq ilân etilgen.
Qırımnıñ rusiyeli ükümetiniñ iç siyaset, haber ve alâqa naziri Dmitiry Polonskiy Varşavada ОSCE toplaşuvında iştirak ete.
Evel Poloniya memleket kirişini Qırımnıñ diger rusiyeli baş nazir muavini Georgiy Muradovğa yasaqladı. Qırmınıñ şimdiki başı Sergey Aksenov bunı halqara ameliyatnıñ bozuluvı olaraq adladı.
