Qırımnıñ rusiyeli akimiyetiniñ temsilcisi Ukraina prezidenti Petro Poroşenkonı yarımdanı ziyaret etmege çağırdı. Bunı RİA Novosti agentligne Qırım parlamentiniñ spiker-muavini Andrey Kozenko bildirdi
«Bugün ukrain akimiyetiniñ esas vazifesi – özüne diqqat çekmektir, er angi usul ile özüni tanıtmaq. Qırım aqqında aytqanda, ukrain siyasetçilerinden iç biri qırımlılarnıñ aytqanını, duyğanını, yaşağanını tüşünmedi. Kimse kelmedi. Men, misal içün, Poroşenko kelse, quvanır edim. Onı Qırım ve Donbass territoriyasında etken er şey içün mesuliyetke çeker edik», – dedi o.
Şunı da qoştı ki, Poroşekno Qırım ve Donbassqa nisbeten «qızğın milletçi» siyasetiniñ tarafdarıdır.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler. Afta devamında Qırım ile memuriy sıñırdan bir yük maşinası bile keçmedi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ Qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
