Herson vilâyetinde Qırım ile memuriy sıñrda «Kalançak» kiriş noqtasında, vilâyet millitsiyası yolbaşçısınıñ muavini İlya Kiva bildirgeni kibi, Ukrainanıñ qocaman bayrağını açqanlar.
«Bugün işğal etilgen Qırım ile kiriş noqtasını teşkerdiler. Qamaçav 100% devam ete. «Titan» zavodına qadar demiryol pıtağı qapalı. «Kalançak» kiriş noqtasında qocaman devlet bayrağını açıp, duşmannı şaşırttılar! Qırım – Ukrainadır!!!» – yazdı Kiva Facebookta.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler. Afta devamında Qırım ile memuriy sıñırdan bir yük maşinası bile keçmedi.
