Link açıqlığı

Nebiyevler «acele» yardımda atış neticesinde elâk olğan tibbiyet adamlarınıñ ailelerinden afu soradı – matbuat vastaları


Qırımda Nebiyevler qorantası açıq mektüp vastası ile «acele yardım» stantsiyasında aile başı Bekir Nebiyevniñ ellerinden açılğan atış neticesinde elâk olğan ekimlerniñ qorantalarından afu soradı. Bunı salı künü, sentâbr 29-da, ATR telekanalında «Zaman» programmasında bildirdiler.

«Bugün ailemz babamıznıñ tarafından yapılğan ağır cinayet içün medeniy mesüliyet yüküni taşıy. Pek ağır yük, bütün ömür devamında omuzlarımızda olacaq. Hucur körünse de, babamıznıñ ellerinden zarar körgen er kesten afu soraymız. Bu künleri Allahtan elâk olğanlarnıñ qorantalarına bu dertke dayanmaq içün quvet, zarar körgen insanlarğa şifa ve uzaq ömür soraymız», – dep bildirile mektüpte.

Nebiyevlerniñ ailesi vaqianı siyasetleştirmemek rica ete, bildirilgeni kibi, vaqiağa «siyasiy, provokatsion ya da milliy alâmetler» ait degil.

«Adiy insanlarğa, siyasetçi ve matbuat vastalarına muracaat etemiz. Mında siyasetni bağlamañız. Olmağan şeylerni uydurmağa kerekmey. Bir insannıñ tarafından başqalarına nisbeten siyasiy, provokatsion ya da milliy alâmetlersiz yapılğan cinayettir. Aqlamağa olmay. Ailemiz bu dertnen yaşamağa mecbur olacaq», – denile beyanatta.

Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.

Qırım boyunca Rusiye Federatsiyasınıñ Taqiqat komitetiniñ baş idaresi Rusiye Cinaiy Kodeksiniñ 105 maddesi 2-nci qısmına binayen cinaiy işni açtı (eki ve ziyade insannıñ öldürilmesi).

Sentâbr 29 künü Rusiye İçki işler nazirligi şeklengen insannıñ bulunuv yeri aqqında bildirgen insanğa 500 biñ ruble vade etti.

XS
SM
MD
LG