Qırımıñ Rusiye Devlet şurasınıñ deputatı Sergey Şuvaynikov AQŞ prezidenti Barak Obamağa Qırımnı ziyaret etip, yarımada siyasiy vaziyetine öz başına qıymet kesmege teklif ete.
Bunı o Amerika prezidentiniñ BMT Baş assambleyasındaki çıqışını Qırım.Aqiqatqa izaatlap ayttı.
«Barak Obamanı Qırımnı şahsiy sürette ziyaret etmege çağırar edim. İnsanlar sanki işğal etilgen territoriyada nasıl yaşap kelgenini körer edi. Qırımğa kelgen sabıq İtaliya yetekçisi yapqanı kibi, soqaqlarda kezsin. Qarşılarmız, insanlarnen subetleşsin», – dey Şuvaynikov.
Qırım deputatı emin, Obama böyle yapsa, «Qırımdaki vaziyet onıñ tasavur etkeni kibi olmağanını ve Ğarp sanktsiyalarını qazanmağanını» añlar.
New-Yorkta BMT Baş assambleyasınıñ 70-nci sessiyasında oktâbr 3-ne qadar sürecek muzakereler başlandı.
Barak Obama öz çıqışında memleketi Rusiyege qarşı cezalarnı onıñ Qırım işğali ve Ukraina şarqındaki istilâsına cevap olaraq kirsetkenini qayd etti. Dey ki, böyle areketler devam etse, bu kibi taqdir diger memleketlerni de bekley bile.
