Link açıqlığı

Aqmescitte salı künü İçki işler nazirligi ve mahsus bölüklerniñ hadimleri şeerden Konstantinovka köyüne qadar er yerde, hususan ormanlarda, Aqmescitte keçken raatlıq künleri ekimlerniñ öldrüvinde şeklengen erkekni qıdıralar.

Qırım.Aqiqatqa Aqmescit rayonı «Yağmurça» («Fontanı») mikrorayonınıñ sakinleri aytqanı kibi, silâlı arbiyler, uquq qoruyıcılar olarğa «atıcınıñ» işbu rayonnıñ yanındaki ormanında olğanını bildirdiler.

«Saba qapunı qaqtılar. Azbarğa kirmege rica ettiler. Bir qaç insan, olarnıñ arasında politsiya ve arbiyler. Azbar, anbar, mağaznı baqtılar. Soñra ekimlerge ateş açqan insannı körmedikmi, dep soradılar. Fotosüretini kösterdiler. Soñra afu sorap, kettiler», – dedi Qırım.Aqiqatqa yerli sakin Elnara.

İnsanlarnı soqaqlarda muqayt olmağa çağıralar, bu rayonda ve Acı Qal köyüniñ etrafında yaşamağanlarnı mında yaqınlaşmamağa çağıralar.

«Qırım Cumhuriyeti territoriyasında ciddiy cinayet yapıldı – «acele» yardım hadimlerine ücüm, neticede eki insan elâk oldı. Şimdi içki işler organları işbu cinayetniñ yapıluvında şeklengen insannı belgiledi, onı tutmağa areket eteler», – dey Qırım.Aqiqatqa Qırım İçki işler nazirliginiñ Qırım idaresiniñ matbuat hızmetiniñ başı Оlga Kondraşova.

Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.

Qırım boyunca Rusiye Federatsiyasınıñ Taqiqat komitetiniñ baş idaresi Rusiye Cinaiy Kodeksiniñ 105 maddesi 2-nci qısmına binayen cinaiy işni açtı (eki ve ziyade insannıñ öldürilmesi).

XS
SM
MD
LG