Link açıqlığı

Saatnıñ esas haberi

Qırım qamaçavınıñ faalleri aş ile «gumanitar komvoylarnı» siyasiy mabüslerge deñiştirmege azır


Qırımnıñ «vatandaşlıq» qamaçavınıñ teşebbüsçilerinden biri, ATR qırımtatar telekanalınıñ saibi Lenur İslâmov dey ki, «ruslar» qamaçav teşkilâtçılarınıñ talaplarından birini yerine ketirmege teklif etken ediler – siyasiy sebeplerden maküm etilgen qırımtatarlarnı azat etmek. Olarnı Rusiye arbiy esirlerine deñiştirmege teklif etken ediler. Amma, ATR saibi degeni kibi, aktsiya teşkiliy komiteti bu teklifni red etti.

«Terroristlerni vatanperverlerge deñiştirmemek qararını aldıq. Deñiştirsek, ukrain bayraqları altında Qırım tarafına baracaq gumanitar komvoylarğa deñiştirecekmiz. Öyle qarar alsalar, anda bulunğan semetdeşlerimiz içün ne qadar kerek olsa, o qadar erzaqnı yollarmız», – dedi o.

Bu kibi teklif aqqında malümatnı diger qaynaqlarda tasdiqlamaylar.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG