«Qırımnıñ ticaret birligi»niñ başı Sergey Makeyev dey ki, şimdi ve ileride de Qırım Herson vilâyeti tarafından keçirilgen «erzaq» qamaçavını duymaz. Emindir, yarımada çarşıları boşatılğanda, mında Rusiye Krasnodar diyarınıñ satıcıları kelip çıqar.
Bunı Makeyev Qırım.Aqiqatqa bildirdi.
Onıñ aytqanı kibi, Qırımda «Aşan» ve «Metro» ticaret ağları daa yıl evelsi Rusiye malına keçti, aynı böyle, Makeyevniñ sözlerine köre, «Furşet», «Silpo», «Yabloko» tükânları da etti.
«Çarşı ve ufaq tükânlarda Ukrainadan ketirilgen malnıñ miqdarı büyük edi. Amma o da farqlı. Misal içün, domuz ve tuvar etiniñ bir 50% Ukrainadan edi. Amma şimdi bu zonada istimal azlaşacaq», – dey ekspert.
Emindir, aktsiya iştirakçileri «Qırım qamaçavını degil de, ukrain istisalcılarınıñ qurşavını teşkil ettiler».
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.
Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.
Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.
