Aqmescit civarında Acı Qal (Çistenkoye) köyü sabadan uquq qoruyıcılar tarafından sarıp alınğan, politsiya Aqmescitte tibbiyet adamlarını öldürgen insannı qıdırıp, ev, azbar, anbarlarnı tintey.
Qırım.Aqiqatqa yerli sakinler aytqanı kibi, evlernen bir sırada vesiqalar teşkerile. Köyge kirgen ve çıqqan maşinalar silâlı quvetler tarafından baqıla.
Rusiye politsiyasınıñ hadimleri köylülerge bunı raatlıq künü olğan vaqia ile añlatalar. Uquq qoruyıcılarnıñ aytqanı kibi, şeklengen şahıs Acı Qal yanında saqlana bile.
Köyde içtimaiy obyektlerni qoruylar – mektep, FAP, bala bağçasını. Köyniñ soqaqlarında er 100-200 metr arasında blokpostlar tura.
Yerli sakinlerniñ aytqanı kibi, arbiyler uquq qoruyıcılar ile orman ve köy etrafını baqıp çıqalar.
«Bütün politsiya celp etildi, cumhuriyetniñ rayonlarından biri bütünley sarıp alınğan. Uquq nizamınıñ quvetleri de tertipni qoruy. Eminim, bu erifni taparmız. Böyle şeyler qattı sürette ve er kesniñ ögünde cezalanmalı», – dedi Qırımnıñ rusiyeli başı Sergey Aksenov.
Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.
Qırım boyunca Rusiye Federatsiyasınıñ Taqiqat komitetiniñ baş idaresi Rusiye Cinaiy Kodeksiniñ 105 maddesi 2-nci qısmına binayen cinaiy işni açtı (eki ve ziyade insannıñ öldürilmesi),
Aqmescitte sentâbr 28 künü elâk olğan tibbiyet adamları ile vedalaştılar.
