Aqmecsit rayonı Acı Qal (Çistenkoye) köyünde, sentâbr 28 künü, saba silâlı ve kamuflâjlı insanlar toplanğan. Bunı Qırım.Aqiqatqa yerli sakinler bildire.
Olarnıñ sözlerine köre, uquq qoruyıcılar köyniñ bir sıra binanı sarıp alğan. Aqyar-Aqmescit yolu yanında bir qaç maşina ve politsiya hadimleri buluna.
Yerli sakinler silâlı quvetlerniñ mında bulunuv maqsadını bilmeyler. Bazıları talimat keçirilecegini tüşüne, digerleri raatlıq künleri Aqmescitte «acele» yardım hadimlerine ücüm etken erkekniñ qıdıruvı ile bağlaylar.
Yarımada uquq qoruyıcılarınıñ bu aqta resmiy izaatı şimdilik yoqtır.
Cumaertesi künü, sentâbr 26-da, av tüfegi ile silâlanğan erkek Aqmescitte Sevastopolskaya soqağında yerleşken «acele» yardım binasına kirip, hastahaneniñ dört hadimine ateş açtı. Eki hadim elâk oldı. Yaralanğan feldşer bazar kününe keçer gecesi ameliyattan keçti, alı ağır. Ücüm etici vaqia yerinden maşinağa oturıp qaçtı. Birazdan uquq qoruyıcıları bildirgeni kibi, ücüm etken – Aqmescit sakini 1960 senesi doğğan Bekir Nebiyevdir. Qıdıruv alıp barıla.
Qırımnıñ rusiyeli başı Sergey Aksenov elâk olğan qadınlarnıñ ailelerine ve zarar körgenlerge maliyeviy yardım kösterilecegini vade etti.
