Link açıqlığı

Krasnodar taqiqat komitetinde bulunğan qırımtatarlarnıñ yetekçisi Mustafa Cemilevniñ oğlunı qanunsızca Astrahan vilâyetine avuştırdılar. Bunı advokatı Nikolay Polozov bildirdi.

«Belli olğanı kibi, Hayser Cemilevni Astrahan vilâyetine avuştırdılar», – yazdı o Twitterde.

«Cemilevniñ diger regionğa qanunsız avuştırıluvı – Rusiye akimiyetiniñ babasınıñ siyasiy faaliyetine cevabıdır», – dey advokat.

O dey ki, Rusiye Federatsiyasınıñ qanuniyetine köre, Hayser Cemilev yaşağan yeri – Qırımda, ya da üküm çıqarılğan Krasnodarda bulunmaq kerek.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

Aqmescitniñ Kiyev rayon mahkemesi Hayser Cemilevni apiske aldı. Qırım işğalinden soñ taqiqat organları bu işni ğayrıdan taqiq etmege qarar berdiler. Hayserni Qırım SİZOsından Krasnodar ülkesine alıp kettiler.

Hayser Cemilev qabaatını tanımay. Adliyecisi öldürüv diqqasızlıqtan sebep olğanını bildire. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey.

XS
SM
MD
LG