Link açıqlığı

Kalançakta «Pravıy sektor» NTV jurnalistini tuttıp, onı ukrain uquq qoruyıcılarınа teslim etti


Qırım ile memuri sıñırdaki «Kalançak» kiriş noqtasında «Pravıy sektor» askerderi NTV Rusiye telekanalınıñ jurnalistini tuttılar. Bu aqta Qırım.Aqiqat mühbirine teşkilâtnıñ spikeri Aleksey Bık bildirdi.

Onıñ sözlerine köre, aqşam, sentâbr 24-de, askerler gizli sürette ukrain blokpostını ve arbiylerni fotoğa çıqarmağa areket etken qadınnı körgenler.

«Vesiqalarnıñ teşkerüvi qadın NTV (Rusiye) telekanalınıñ jurnalisti olğanını kösterdi. Onı Ukraina vatandaşı olğan aydavcı ketirgen edi. Yaqalanğanlarnı ukrain uquq qoruyıcılarına teslim ettiler», – dey Aleksey Bık.

Ukrain uquq qoruyıcı organlarınıñ saytlarında bu aqta malümat şimdilik yoq.

NTV Rusiye telekanalıbildirgenine köre, jurnalist Yekaterina Voroninanı «doquz saat sorğuda tuttılar», bundan soñ o «itirazı olmağanı aqta» kâğıtnı imzaladı.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG