Qırımda qırımtatarlarnıñ milliy-teritorial muhtariyetiniñ teşkil etilmesi aqqında aytmaq içün, sualni er taraftan ögrenmege kerek. Bunı Ukraina birinci prezidenti Leonid Kravçuk Qırım.Aqiqat Radoisınıñ efirinde bildirdi.
«Milliy-qavmiy muhtariyet ğayesi diqqatqa lâyıq. Bunı ögrenmek kerek, nasıl yapılacaq, buña halqara toplulıq nasıl davranır ve böyle shemanı teklif etmek. Menimce, doğru olacaq», – dey o.
Kravçuk şunı da qayd etti ki, bu ğaye 90-ncı seneleri qırımtatarlar sürgünlikten Qırımğa qaytmağa başlağanda seslendiriligen edi.
«Birinciden, anda o qadar qırımtatarı daa yoq edi. Olar o vaqıt Qırımda ayat tarzı ve turmuş şaraitlerini özleri içün daa belgilemegen ediler. Topraq, insanlarnıñ regionlar boyunca tarqatılması. O zaman öyle imkân yoq edi. Ve ekinciden, insanlar buña azır degil edi. Menimce, qırımtatarlarnıñ özleri de azır degil edi», – dey Kravçuk.
Qırımtatarlarnıñ yetekçileri Ukrainanıñ yañı Anayasasında Qırımğa qırımtatarlarnıñ milliy-territorial muhtariyeti statusınıñ berilmesinde israr ete.
