Link açıqlığı

Ukrainanıñ birinci prezidenti Leonid Kravçuk qırımtatarlarnıñ yetekçileri tarafından başlanğan Qırım qamaçavı neticesinde Rusiye insan aqları ve serbestliginiñ bozuluvını toqtatır dep tüşünmey. Bunı o Qırım.Aqiqat Radiosınıñ aqşam efirinde bildirdi.

«Rusiye insan aqlarını bozmağa toqtar dep tüşünmeyim. Tek Qırımda da degil. İstilâiy diktator akimiyeti. Ukrainağa qarşı tecavuznı köstere: Donetsk, Lugansk, anda bir 10 biñ Rusiye ordusı, silâ, diversant, ödünç askerleri buluna. Yalıñız insan aqları degil ki, insanlarnıñ öldürüvi. İnsan aqlarınıñ bozuluvından da beter, cenktir. Şunıñ içün Rusiye, Rusiye ordusı, yarımadada olğan Rusiye akimiyeti diktatorlıq rejimini demokratiyağa deñiştirecegine iç bir vaqıt inanmam», – dey o.

Kravçuk qırımtatarlarnıñ Qırımnıñ «erzaq qamaçavı»nıñ teşkil etilmesi boyunca mevamını doğru tanıdı. Onıñ sözlerine köre, Ukraina onıñ toprağını işğal etken memleketni aşattırmamalı.

«Qırımda işğalciler, ordular, devlet strukturaları bulunа. Qırım içün Rusiye mesüliyetlidir. Bunıñ ile – Ukraina Qırımnı aşata. Fayızlarnı aytamam, amma işğalcilerni aşata», – dey Kravçuk.

Qırım ile memuriy sıñırda kötere çarşılarınıñ teşkil etilmesi aqta ğayelerge qol tuttı. «Er angi rayondan insanlar keliñiz. Satın alıñ, aqçanı Ukrainada qaldırıñ. Bücetke kele. Bizni aşaladılar, toprağımızın aldılar, tiz çökmege mecbur ettiler, şimdi – bizni aşatıñ deyler».

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Aktsiya idare şurasınıñ malümatına köre, memuriy sıñırdan yolcular ve yengil naqliyat maniasız keçecektirler.

Qamaçav teşebbüsçileri degeni kibi, ukrain şirketleri Qırım ile ticariy munasebetni toqtatmaq kerek, çünki yarımada territoriyası Rusiye Federatsiyası tarafından işğal etilgen. Teşkilâtçılarnıñ malümatına köre, olarnıñ talapları yerine ketirilmegence, qamaçavnı toqtatmaycaqlar, yani siyasiy mabüslerniñ azat etilmesi, mustaqil matbuat vastalarına basqı kösterilmemesi, yarımadağa halqara nezaretçilerniñ kelmesi, qırımtatarlarğa qarşı areketlerniñ toqtatılması ve ilâhre.

Qırımnıñ rusiyeli akimiyeti böyle areketlerni takbih ete, amma yarımada sakinleri «erzaq qamaçavı»nıñ aqibetlerini duymaz, dep tüşüne.

XS
SM
MD
LG